- ప్రారంభించిన కలెక్టర్లు, ప్రజాప్రతినిధులు
నిర్మల్/ఆసిఫాబాద్/లక్సెట్టిపేట/జైపూర్/ఆదిలాబాద్ టౌన్, వెలుగు: రాష్ట్ర ప్రభుత్వం విద్యకు అధిక ప్రాధాన్యత ఇచ్చి ఉత్తమ విద్యార్థులను తయారు చేయడమే లక్ష్యంగా పనిచేస్తోందని కలెక్టర్లు అన్నారు. శనివారం ఉమ్మడి జిల్లా వ్యాప్తంగా ప్రభుత్వ స్కూళ్లలో ఆర్టిఫిషియల్ ఇంటెలిజెన్స్(ఏఐ) ల్యాబ్లను ప్రారంభించారు. లక్సెట్టిపేట మండలం వెంకట్రావుపేటలోని ప్రైమరీ స్కూల్లో, జైపూర్ మండల కేంద్రంలోని జడ్పీ హై స్కూల్లో ఏర్పాటు చేసిన ఏఐ ల్యాబులను కలెక్టర్ కుమార్ దీపక్.. ఎమ్మెల్యే ప్రేమ్సాగర్తో కలిసి ప్రారంభించారు.
నేటి విద్యా వ్యవస్థలో కృత్రిమ మేథ ఎంతో అవసరమని, ఏఐ ద్వారా విద్యార్థుల్లో సంకేతిక పరిజ్ఞానం పెరుగుతుందన్నారు. డీఈవో యాదయ్య, హెచ్ఎం హెలెన్ డారతి తదితరులు పాల్గొన్నారు. ఏఐ శిక్షణను విద్యార్థులు సద్వినియోగం చేసుకోవాలని ఆదిలాబాద్కలెక్టర్ రాజర్షి షా సూచించారు. ఆదిలాబాద్ రూరల్ మండలం తాటిగూడ ప్రభుత్వ ప్రైమరీ స్కూల్లో ఏఐ శిక్షణ తరగతులను ఆయన ప్రారంభించారు. ప్రభుత్వం మొదట 6 జిల్లాల్లో ఏఐ ఆధారిత ఆన్లైన్ లెర్నింగ్ ప్రాసెస్ను ప్రారంభించిందన్నారు. డీఈఓ ప్రణీత, ఎంఈఓ మనోహర్ తదితరులు పాల్గొన్నారు.
నిర్మల్ జిల్లాలో 16 స్కూళ్లలో ల్యాబ్లు
ప్రైవేటుకు దీటుగా ప్రభుత్వ స్కూళ్లలో విద్యాభోదన చేసేలా రాష్ట్ర ప్రభుత్వం పటిష్ట చర్యలు చేపడుతోందని నిర్మల్ కలెక్టర్ అభిలాష అభినవ్ అన్నారు. నిర్మల్ గ్రామీణ మండలం మేడిపల్లి హైస్కూల్లో అడిషనల్ కలెక్టర్ పైజాన్ అహ్మద్తో కలిసి ఏఐ ఆధారిత కంప్యూటర్ ల్యాబ్ను ప్రారంభించారు. కలెక్టర్ మాట్లాడుతూ.. ప్రభుత్వ స్కూళ్లలో విద్యార్థులకు నాణ్యతా ప్రమాణాలతో విద్యను అందించేందుకు చర్యలు తీసుకుంటున్నట్లు చెప్పారు.
ప్రాజెక్టులో భాగంగా నిర్మల్ జిల్లాలో 16 ప్రభుత్వ స్కూళ్లలో ఏఐ ఆధారిత కంప్యూటర్ ల్యాబ్లను ప్రారంభించనున్నట్లు తెలిపారు. డీఈవో పి.రామారావు, తహసీల్దార్ సంతోష్, ఎంపీడీవో గజేందర్ తదితరులు పాల్గొన్నారు. ఆసిఫాబాద్ జిల్లా రెబ్బెన మండలం తక్కల్లపల్లిలోని జిల్లా పరిషత్ హైస్కూల్లో ఏఐ ద్వారా టెన్త్ విద్యార్థులకు బోధన అందించే కంప్యూటర్లను కలెక్టర్ వెంకటేశ్ధోత్రే ప్రారంభించారు.
జిల్లాలో తొలి విడతగా 4 స్కూళ్లలో ఏఐ ల్యాబ్ లను ఏర్పాటు చేసేందుకు చర్యలు తీసుకుంటామని తెలిపారు. భాష, గణిత సామర్థ్యాలను పెంపొందించేందుకు ఆర్టిఫిషియల్ ఇంటిలిజెన్స్ ఎంతో దోహదపడుతుందన్నారు. తహసీల్దార్ రామ్మోహన్, ఎంపీడీవో శంకరమ్మ తదితరులు పాల్గొన్నారు.
